Есөн настай охиноо хүчирхийлсэн хэрэг гарлаа

Бага насны хүүхдүүд, хэлд, хөлд ороогүй бяцхан үрс таних, танихгүй хэн нэгэн этгээдийн бэлгийн дур хүслээ ёс бусаар хангах хэрэгсэл болж тарчлан зовж буй талаар бид бишгүйдээ л мэдээлж, иргэд ч шүд зуун тэвчсээр өдийг хүрсэн. Гэвч нэг л өдөр тэсэрдэг гэдгийг өнгөрсөн сарын 31-нд болсон хүүхдийн хүчирхийллийн эсрэг “Дахин тэвчихгүй” жагсаал харуулсан билээ. Тус жагсаалын үеэр жагсагчид төрийн гурван өндөрлөгт бичиг илгээж

-Эрүүгийн хуулиар хүүхдийн хүчирхийлэл үйлдсэн хүнд оногдуулах ялын бодлогыг чангатгах,

-Гэмт этгээдийн ял завших боломжийг хязгаарлах эрх зүйн зохицуулалтыг боловсронгуй болгох,

-Гэр бүлийн хүчирхийллийн тухай хуулийн хэрэгжилтийг хангах гэх мэт маш тодорхой зүйлүүдийг анхааралдаа авахыг шаардсан. Гэвч энэ хуулийг хэзээ чангатгаж, хүчирхийлэгчдэд хэзээ хатуу шийтгэл оноох нь тодорхойгүй хэвээр. Хүүхдүүд хүчирхийлэлд өртсөөр байна.

Түүнээс хоёрхон хоногийн дараа буюу энэ сарын 4-ний үүрээр 05:00 цагийн орчим мөн л Сонгинохайрхан дүүргийн 19-р хороонд бага насны хүүхэд хүчирхийлсэн аймшигт хэрэг дахин бүртгэгдсэн байна. Тодруулбал,  тус хороонд суух, 23 настай Ш гэх залуу архи согтууруулах ундааны зүйл хэтрүүлэн хэрэглэсэн үедээ есөн настай охиноо хүчирхийлсэн байна. Охин ээжийгээ дагаж ирсэн бөгөөд Ш гэх этгээд хойд эцэг нь байжээ. Тэрбээр эл гутамшигт хэргээ үйлдээд, хэргийн газраас зугтсан байсныг цагдаагийн алба хаагчид дуудлага мэдээллийн дагуу түргэн шуурхай илрүүлэн баривчилжээ.

Дэлхийн хамгийн тэнэг аав

Өмнөд Африкийн зүүн булан дахь Порт Элизабетийн ойролцоох Квадвэши тосгонд  38 настай нэгэн эр хууль бусаар баригдсан байшингуудыг нураах ажиллагааг эсэргүүцэхийн тулд өөрийн 6 сартай охиныг тэврэн байшингийн дээвэр рүү гарчээ. Тэрээр байшингуудыг нураахыг эсэргүүцэхийн тулд охиныг байшингийн дээврээс шидсэн байна. Охиныг тосон авахын тулд 5 цагдаа байшингийн доор зогссон бөгөөд түүнтэй ярилцахаар нэг цагдаа дээвэр рүү гарчээ. Хамгийн аймшигтай нь хүүхдээ унагахаар сүрдүүлж түүнийг өрөөсөн хөлнөөс нь барин савлуулж байжээ.

 

Энэ хэрэг нь анх тэдний амьдарч буй байшинг нураах шийдвэр гарсны улмаас үүссэн юм. Эдгээр иргэдтэй нураах ажиллагааг хариуцсан багийнхан хэлэлцээр хийхийг оролдсон боловч тэд ямар нэгэн оновчтой шийдэлд хүрч чадаагүй учир ийнхүү цагдаагийн хүчээр зохицуулхад хүрсэн байна. Нийтдээ 150 гаруй иргэд эсэргүүцлээ илэрхийлж нураах ажлыг явуулж буй хүмүүс руу гартаа таарсан чулуу, тоосго шидэж, замын голд хаймар дугуй шатааж орох замыг нь хүртэл хаагаад байжээ. Ингээд энэхүү маргааныг зохицуулахаар цагдаагийн байгууллагын ажилчид ирцгээсэн байна.

 

Гэтэл иргэдийн нэг охиноо байшингийн дээвэр дээрээс унагана хэмээн сүрдүүлжээ. Залуугийн энэхүү үйлдлийг бусад нь дэмжиж охиныг “шид шид шид” хэмээн орилцгоосон байна.

Түүний уг аймшигт үйлдлийг зогсоохоор дээвэр рүү гарсан цагдаа залууг охины хамт буулгахыг оролдсон ч тэрээр эсэргүүцэж охиноо доош нь унагажээ.

 

Тус газрын цагдаагийн дарга Андре Бээтгэ орон нутгийн мэдээллийн албанд хэлэхдээ: “Өглөөний 10 цагийн үед 38 настай эр байшингуудын нэгэн рүү охиноо авч гараад тус барилгуудыг нураахаар зэхэж буй багийн хүмүүсийг эсэргүүцэж уг үйлдлийг хийсэн” гэжээ.

 

Азаар доор байсан цагдаа нар охиныг ямар ч гэмтэл, осолгүйгээр барьж авч чадсан байна.

“Цагдаа нар зохион байгуулалттай ажиллан бяцхан охиныг аварч, түүний аавыг аюулгүй болгож чадсан” хэмээн тус газрын цагдаагийн албанаас мэдээлжээ.

 

Хууль сахиулагчид охины аавыг баривчилсан бөгөөд тэрээр одоо хүний амь хөнөөхөөр завдсан хэргээр саатуулагдсан байна.

Ахмадын хэлж байгаагаар “Одоо бяцхан охиныг ээж нь харж байгаа бөгөөд орон нутгийн нийгмийн халамж үйлчилгээний байгууллагууд охины аюулгүй байдлыг давхар хянаж байгаа” гэжээ.

 

Уг хэргийг амжилттай шийдвэрлэсэн цагдаагийн албаны хүмүүсийг дээд албанаас сайшаасан байна. Хотын удирдлага хэлэхдээ: “Аав хүн ердөө хууль бус барилгыг нураах ажлыг эсэргүүцэхийн тулд өөрийн охины амь насыг золиослоно гэдэг хэний ч санаанд оромгүй зүйл азаар охиныг аюул осолгүй аварч чадсан нь сайн хэрэг. Охины аав хийсэн хэргийнхээ хариуцлагыг хуулийн дагуу хүлээх ёстой” гэсэн байна.

Энэхүү хэргийн дараагаар эзэмшилгүй газар хууль бусаар баригдсан 90 барилгыг амжилттай нураажээ.

 

Be the first to comment on "Есөн настай охиноо хүчирхийлсэн хэрэг гарлаа"

Leave a comment

Your email address will not be published.


*